დედაქალაქს ისტორიული შენობები შეუნარჩუნდება

წარმოდგენილი გადაწყვეტილებებით, დედაქალაქს ისტორიული შენობები შეუნარჩუნდება, – ასე ეხმაურება თბილისის საკრებულოს ურბანული დაგეგმარებისა და საქალაქო მეურნეობის კომისიის თავმჯდომარე დედაქალაქის მთავრობის სხდომაზე განხილულ საკითხებს.

როგორც თბილისის საკრებულოს მიერ გავრცელებულ ინფორმაციაშია აღნიშნული, სოხაძემ „ლაგუნა ვერეს“ პროექტისა და აბრეშუმის ქარხნის ძველი შენობის თაობაზე საკუთარი მოსაზრებაც გამოთქვა.

რევაზ სოხაძემ აღნიშნულთან დაკავშირებით თბილისის მერის მიერ გაკეთებულ განცხადებებს მნიშვნელოვანი უწოდა და აღნიშნა, რომ პროექტის განხორციელების შემდეგ, „ლაგუნა ვერეს“ ინფრასტრუქტურა მთლიანად შენარჩუნდება.

„მთავრობის სხდომიდან მინდა ორ საკითხს შევეხო. პირველი – ეს არის ისტორიული საცურაო აუზი, რომლის ტერიტორია დედაქალაქის მუნიციპალიტეტს უბრუნდება. წარმოდგენილი პროექტის შესაბამისად, ობიექტის აღდგენა მოხდება არა მხოლოდ სპორტულ-გამაჯანსაღებელი, არამედ, არქიტექტურული კუთხითაც”, -განაცხადა რევაზ სოხაძემ და ამასთანავე აღნიშნა, რომ ასევე შენარჩუნდება ტერიტორიაზე განთავსებული აბრეშუმის ქარხნის ძველი შენობა.

მისივე თქმით, აბრეშუმის ქარხნის ძველი შენობა, რომელიც მართალია, არ არის კულტურული მემკვიდრეობის ძეგლი, იყო ერთ-ერთი პირველი ფაბრიკა ამიერკავკასიაში და შესაბამისად, მას აქვს ისტორიული მნიშვნელობა.

,,მუნიციპალიტეტი სამოქალაქო საზოგადოების ჩართულობით დაიწყებს პროექტის განხილვას. დაგეგმარებისას არსებული გარემოების გათვალისწინებით, ეს შენობა არა მხოლოდ შენარჩუნდება, არამედ, მოხდება მისი შერწყმა თანამედროვე არქიტექტურასთან. აღნიშნული ტერიტორიის განვითარების კონცეფციაზე ჩვენც ვმსჯელობთ. შესაბამისად, გვექნება ჩვენი წინადადებები და მოსაზრებები, რასაც დამკვეთს და პროექტის ავტორს გავაცნობთ. ვფიქრობთ, საბოლოო ჯამში ქალაქისთვის მისაღებ პროექტს მივიღებთ’’, -აღნიშნა სოხაძემ.

დღესვე, რევაზ სოხაძემ ოპოზიციის მოსაზრებას, სატრანსპორტო მიმართულების გაუარესების თაობაზე უსაფუძვლო უწოდა და აღნიშნა, ამ მოსაზრებას არანაირი დოკუმენტური საფუძველი არ გააჩნია.

,,პირიქით, ჩვენ ყველაფერს გავაკეთებთ, რომ ამ კუთხით მდგომარეობა გამოვასწოროთ და დარწმუნებული ვარ, რომ თბილისს კიდევ ერთი მნიშვნელოვანი ობიექტი შეემატება’’, -განაცხადა საკრებულოს წევრმა.