გურჯაანის მუნიციპალიტეტის მერიის ორგანიზებით და ვეტერანების საქმეთა სახელმწიფო სამსახურის მხარდაჭერით, გურჯაანის მუნიციპალიტეტის სოფელ ვაჩნაძიანში, 2008 წლის რუსეთ -საქართველოს ომში დაღუპული მეომრის, ალექსი ნატროშვილის სახელობის ტურნირი ჩატარდა მინი ფეხბურთში.
ასპარეზობაში გურჯაანის მუნიციპალიტეტის 6, თელავის 1 და თავდაცვის სამინისტროს მეოთხე ქვეითი ბრიგადის გუნდები მონაწილეობდნენ.
ვეტერანების საქმეთა სახელმწიფო სამსახურის მიერ გავრცელებული ინფორმაციით, ფინალური ორთაბრძოლა სოფელ კალაურისა და მეოთხე ბრიგადის ნაკრებ გუნდებს შორის გაიმართა და ამ უკანასკნელის გამარჯვებით დასრულდა.
„ტურნირის მონაწილეებსა და გამარჯვებულ გუნდს ვეტერანების საქმეთა სახელმწიფო სამსახურის მიერ დაწესებული თასები, მედლები და სიგელები სამსახურის რეგიონული მართვის დეპარტამენტის კახეთის სამმართველოს უფროსმა, თამაზ კალატოზიშვილმა გადასცა, ტურნირის გარდამავალი თასი კი, წლევანდელ ჩემპიონს, გურჯაანის მუნიციპალიტეტის სპორტული გაერთიანების დირექტორმა, გელა დალაქიშვილმა.
ალექსი ნატროშვილი სოფელ ვაჩნაძიანიდან იყო. იგი, თავდაცვის სამინისტროს მეოთხე ბრიგადაში მსახურობდა, ასმეთაურად. 10 ნოემბერს, მას, 44 წელი შეუსრულდებოდა. ალექსი ნატროშვილი (სიკვდილის შემდეგ) დაჯილდოვდა ვახტანგ გორგასლის I ხარისხის ორდენით.
ალექსი ნატროშვილის სახელობის ტურნირი 2016 წელს დაარსდა და ყოველ წელს ტარდება“, – ნათქვამია გავრცელებულ ინფორმაციაში.