ჰავაის კუნძულებზე ტყის მასშტაბური ხანძრის შედეგად დაღუპულთა რაოდენობა 111-მდე გაიზარდა.
ჰავაის გუბერნატორის, ჯოშ გრინის განმარტებით, სტიქიის ზონაში დაკარგულების მოსაძებნად სამუშაოები გრძელდება. ამ ეტაპზე ხანძრით გადამწვარი ტერიტორიის მხოლოდ ერთი მესამედია შესწავლილი.
სინოპტიკოსების პროგნოზით, უახლოეს დღეებში მაუის კუნძულზე წვიმა და ძლიერი ქარია მოსალოდნელი, რაც სამძებრო სამუშაოებს კიდევ უფრო გაართულებს. ამერიკის შეერთებული შტატების საგანგებო სიტუაციების მართვის ფედერალურმა სააგენტომ სტიქიის ზონაში დამატებით 700 მაშველი და კინოლოგი გაგზავნა.
ძლიერი ხანძარი მაუიზე 8 აგვისტოს გაჩნდა. დაკარგულად ითვლება ასობით ადამიანი. შაბათის მონაცემებით, ათობით ნაპოვნი ცხედრიდან მხოლოდ ორის ამოცნობა მოხერხდა. განადგურებული და დაზიანებულია 2 200-მდე შენობა. წინასწარი შეფასებით, ზარალმა 6 მილიარდი დოლარი შეადგინა.