არ მგონია, რომ ხელისუფლების რომელიმე წარმომადგენლის მხრიდან ადგილი ჰქონდა აშშ-ის ელჩზე თავდასხმას. არ მგონია, რომ სწორი შეფასება იყოს, – ამის შესახებ პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძემ განაცხადა და კელი დეგნანთან დაკავშირებით აშშ-ის სახელმწიფო დეპარტამენტის პრესსპიკერის ნედ პრაისის განცხადება შეაფასა.
მიხეილ სარჯველაძის განცხადებით, აშშ-ის ელჩზე თავდასხმის შესახებ მოსაზრებას ვერ დაეთანხმება.
„ვაი, თუ კარგად არ არის ინფორმირებული ან მისკომუნიკაციას აქვს ადგილი კვლავ, რადგან ამ შემთხვევაში, არ მგონია, რომ ხელისუფლების რომელიმე წარმომადგენლის მხრიდან ადგილი ჰქონდა აშშ-ის ელჩზე თავდასხმას. ამას ვერ დავეთანხმები და არ მგონია, რომ სწორი შეფასება იყოს“, – განაცხადა მიხეილ სარჯველაძემ.
ამასტან, მიხეილ სარჯველაძის განცხადებით, კითხვები გაჩნდა საზოგადოებაში მას შემდეგ, რაც დეგნანთან დაკავშირებით მოსამართლემ ისაუბრა.
„რაც შეეხება საკითხებს, რაზეც დისკუსია გაჩნდა საზოგადოებაში, გამოვიდა მოსამართლე და თქვა ის, რაც თქვა. ამ თემაზე საზოგადოებაში კითხვები გაჩნდა, კითხვები გაუჩნდათ პოლიტიკოსებსაც. გუშინ ჯერ კიდევ ნედ პრაისის განცხადებამდე ვთქვი, რომ კარგი იქნება, ამ მიმართულებით ღრუბლები გაიფანტოს და არ მაქვს განცდა, რომ ამ შემთხვევაში, ადგილი აქვს უბედურებებს, კანონდარღვევებს და ა.შ. მით უფრო იმ ფონზე, რომ თავად ელჩის განმარტება იყო ისეთი, რომ მეგობრებს შორისაც შეიძლება, არსებობდეს გარკვეული უთანხმოება, განსხვავებული ხედვები და ამასთან დაკავშირებით ლაპარაკი აუცილებელია. არ მგონია, ამ შემთხვევაში ვითარება ისე დრამატულად იყოს, როგორ წარმოჩენასაც ზოგიერთი ჟურნალისტი ცდილობს“, – განაცხადა სარჯველაძემ.
ცნობისათვის, აშშ- ის სახელმწიფო დეპარტამენტის პრეს-სპიკერმა ნედ პრაისმა გუშინ ბრიფინგი საქართველოზე საუბრით გახსნა. მისი თქმით, დეზინფორმაცია და პერსონალური თავდასხმები აშშ- ის ელჩ კელი დეგნანზე და მის გუნდზე არ შეესაბამება პარტნიორებს შორის არსებულ კომუნიკაციას. მისივე განცხადებით, აშშ მხარს უჭერს ქართველი ხალხის ევროპულ მისწრაფებებს, თუმცა, ზოგიერთი ქართველი ოფიციალური პირის რიტორიკა მოსახლეობის ამ მიზნიდან ყურადღების გადატანას ემსახურება.