ყოფილი პრეზიდენტი მიხეილ სააკაშვილი ლევან ხაბეიშვილს “ნაციონალური მოძრაობის” თავმჯდომარედ არჩევას ულოცავს.
“ნაციონალური მოძრაობის” თავმჯდომარეობის არჩევნების შედეგების შესახებ მიხეილ სააკაშვილის პოზიცია გიული ალასანიამ კლინიკა “ვივამედში”ექსპრეზიდენტის მონახულების შემდეგ ჟურნალისტებთან გააჟღერა.
მისი თქმით, მიხეილ სააკაშვილს აქვს სურვილი ყველას ახსოვდეს, რომ ძალა ერთობაშია და პარტიის დაშლაზე ლაპარაკი არ უნდა იყოს.
“არაფერში არ ჩარეულა მთელი ეს პერიოდი, მაგრამ ახლა ასეთი პოზიცია აქვს – ძალიან დიდ პატივს ვცემ ნიკა მელიას, მიმაჩნია, რომ ის ნამდვილი გმირიაო, მაგრამ ახლა, დღეს ვულოცავ ლევან ხაბეიშვილს და ვუსურვებ ძალიან დიდ წარმატებებსო. ძალიან დიდი სურვილი აქვს, რომ ყველას ახსოვდეს, რომ ძალა არის ერთობაში და არავითარ დაშლაზე არ იყოს ლაპარაკი.
“ნაციონალურ მოძრაობაში” მიმდინარე პროცესებზე მთელი ეს პერიოდი არასდროს დაუძრავს კრინტი ჩემთან და პირველად ახლა მითხრა”, – განაცხადა გიული ალასანიამ.
“ნაციონალური მოძრაობის“ თავმჯდომარის არჩევნებში ლევან ხაბეიშვილმა გაიმარჯვა. მან ხმების 52, 58% აიღო.