არ ყოფილა პრეცედენტი, რომ არჩევნებში მაღალი შედეგი დაედოს ღიად პრორუსულ ძალას – „ქართულ ოცნებას”იმდენად ეშინია 2024 წლის არჩევნების, ცდილობს, მანიპულაციის მექანიზმები დაიტოვოს, ამიტომ შემოაგდეს ინჯიას ხელით პარლამენტში კანონპროექტი, – ამის შესახებ „სტრატეგია აღმაშენებლის” ლიდერმა გიორგი ვაშაძემ პარლამენტში გამართულ ბრიფინგზე განაცხადა.
მისი თქმით, არგუმენტები, რის გამოც, აპირებენ ძველი პირადობის მოწმებების დაბრუნებას, აბსურდულია.
„მთავარი კითხვა, რომელიც გაჩნდა საზოგადოებაში, არის, თუ რატომ უნდა „ქართულ ოცნებას“ ძველი პირადობის მოწმობები დატოვოს კვლავ მოქმედებაში, უფრო სწორად გაახანგრძლივოს მისი მოქმედების ვადა. იმიტომ, რომ მას არ აქვს შანსი, რომ მოიგოს არჩევნები და უნდა, რომ გაყალბების მექანიზმები დაიტოვოს ხელში. 2011 წელს, ჩემ მიერ იქნა ინიცირებული ID ბარათების პროექტი, ამ პროექტის მიხედვით, 2013 წლისთვის, საქართველოს ყველა მოქალაქეს უნდა ჰქონოდა ID ბარათი და ძველი პირადობის მოწმობები უნდა გაუქმებულიყო. დღეს არის 2023 წელი, ამ დრომდე „ქართული ოცნება” ცდილობს, რომ გაუხანგრძლივოს ძველ, ე.წ „ლამინირებულ” პირადობის მოწმობებს ვადა, რომ ამით შეინარჩუნოს არჩევნების მანიპულაციისა და გაყალბების მექანიზმები.
IRI -ის კვლევა გამოქვეყნდა, რომელიც ცალსახად აჩვენებს, რომ „ქართულ ოცნებას” მომავალ არჩევნებზე გამარჯვების შანსი არ აქვს, შესაბამისად ის ცდილობს, რომ რაღაც მექანიზმებით შეინარჩუნოს არჩევნებზე შედეგის დადების შესაძლებლობა. ამის მაგალითია ძველი პირადობის მოწმობები, ამის მაგალითია, რომ „ერთიანი ნაციონალური მოძრაობისა” და „სტრატეგია აღმაშენებლის” კოალიციის, ამერიკელ და ბრიტანელ კონსულტანტებს არ უშვებენ ქვეყანაში, იმიტომ, რომ ძალიან ეშინიათ შედეგის. არ ყოფილა პრეცედენტი, რომ არჩევნებში მაღალი შედეგი დაედოს ღიად პრორუსულ ძალას, დღეს კი „ქართული ოცნება” არის ღიად პრორუსული ძალა, როგორც ქვეყნის შიგნით, ისე ქვეყნის გარეთ ამაზე არის ჩამოყალიბებული აზრი და შესაბამისად კარგად იცის, რომ ერთადერთი გზა არის როგორმე გაყალბების მექანიზმები შეინარჩუნონ. უფრო მეტიც, მომდევნო არჩევნებზე აღარ იქნება მაჟორიტარული არჩევნები და შესაბამისად, მეორე ტური, რომელიც აძლევდა “ოცნებას” არჩევნების შედეგებით მანიპულაციის საშუალებას. შესაბამისად დღეს, ფრიდონ ინჯიას ხელით, პარლამენტში შემოაგდეს კანონპროექტი, რომლითაც უნდათ, რომ ლამინირებული პირადობის მოწმობა დატოვონ მოქმედებაში.
ფაქტობრივად, აღარ დარჩა ქვეყანა, სადაც უნდათ, რომ არჩევნები დემოკრატიულად ჩატარდეს, და მსგავსი დოკუმენტი არის მოქმედებაში. ჩემო კარგებო, ყველა არგუმენტი, რომელიც დღეს მოჰყავთ, რომ მაინც უნდა შეინარჩუნონ, არის აბსურდული. ასე შეიძლებოდა ჩვენთვისაც ეთქვათ, რომ საბჭოთა პასპორტები დაგვეტოვებინა მოქმედებაში და არ გაგვეცა პირადობის მოწმობა, იმიტომ, რომ ძველ, ლამინირებულ პირადობის მოწმობაზეც ამბობდნენ, რომ ეშმაკია ჩასახულიო, ეს ხომ აბსურდული არგუმენტია.
ტესტი არის მარტივი – ID ბარათებზე კანონი მიღებულია, რომ „ლამინირებული“ პირადობა აღარ უნდა იყოს მოქმედებაში, ახლა “ქართული ოცნებას”იმდენად ეშინია 2024 წლის არჩევნების, ცდილობს, რომ მანიპულაციის მექანიზმები დაიტოვოს. კიდევ ერთხელ მინდა აღვნიშნო, “ლამინირებული” პირადობის მოწმობები შესაძლოა ჩვეულებრივი პრინტერით გაყალბდეს, ამიტომ გავაკეთე მე და ჩემი ინიციატივა იყო, რომ ID ბარათებით დახურულიყო ძველი პირადობის მოწმობებით გაყალბების მექანიზმები საქართველოში”, – განაცხადა ვაშაძემ.