პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძის განცხადებით, პრეზიდენტ სალომე ზურაბიშვილის ნათქვამი „არა და არასდროს“ ნიშნავს იმას, რომ მიხეილ სააკაშვილს არასდროს შეიწყალებს. სარჯველაძემ კომენტარი გააკეთა ერთ-ერთი ტელეკომპანიის ეთერში ნიკა გვარამიას განცხადებასთან დაკავშირებით, რომელმაც პრეზიდენტს მიხეილ სააკაშვილის შეწყალებისკენ მოუწოდა.
როგორც უმრავლესობის დეპუტატი ამბობს, არ ჰგონია, საკუთარი პოზიციის შესაცვლელად რაიმე მიზეზი არსებობდეს, რომლის ახსნასაც პრეზიდენტი შეძლებდა.
„სალომე ზურაბიშვილსა და მიხეილ სააკაშვილს შორის პარალელების გავლება როცა ხდება, ეს მართებული არ არის. სალომე ზურაბიშვილი ისეთ რამეს თუ ჩაიდენს, რაც სააკაშვილმა ჩაიდინა, როცა ვალერი გელაშვილი აცემინა და გირგვლიანის საქმეზე უფლებამოსილება ბოროტად გამოიყენა, რა საკვირველია, ეს იქნება დანაშაული და პასუხისმგებლობას ვერავინ გაექცევა, იქნება ეს პრეზიდენტი სალომე ზურაბიშვილი თუ მიხეილ სარჯველაძე. დანაშაულის ჩადენა არც ერთ შემთხვევაშია გამართლებული. არ შეიძლება, პოლიტიკური მიზანშეწონილობა მსჯავრდებისგან ადამიანის გათავისუფლებას ავტომატურად და მექანიკურად განაპირობებდეს. ვფიქრობ, რომ სალომე ზურაბიშვილის მიმართ ეს მოწოდება მართებული არცერთ შემთხვევაში არ არის. უნდა გადააბიჯოს თუ არა პრეზიდენტმა მის განცხადებას – „არა და არასდროს“, მგონი, ეს ლოგიკურადაც აუხსნელია. პრეზიდენტის ნათქვამი იმას ნიშნავს, რომ ეს არასდროს მოხდება. არ მგონია, რაიმე ახსნადი მიზეზია, რის გამოც პრეზიდენტს შეუძლია ახსნას ის, თუ პოზიციას შეიცვლის“, – განაცხადა სარჯველაძემ.