პრეზიდენტი მთავრობას თუ არ ესაუბრება თავისი ვოიაჟის შედეგების შესახებ, ხალხს მაინც აუხსნას, რა წაიღო და რით წამოვიდა ვიზიტებიდან, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხდა.
როგორც ვოლსკიმ აღნიშნა, პრეზიდენტს ანგარიში ჩასაბარებელი აქვს არა ნინო ლომჯარიასთან ან ქალ დეპუტატებთან, არამედ ხალხთან.
„არ ვფიქრობ, რომ ქალ დეპუტატებთან ან ლომჯარიასთან გამართული შეხვედრები საკმარისია. მისი ვოიაჟის ცალკეულ ეპიზოდებზე ჩვენ არაფერი ვიცით. ერთადერთი ვიცით, რომ ლატვიის პრეზიდენტს შეხვდა, რომელმაც შეხვედრის შემდეგ აღნიშნა, რომ საქართველოში გარკვეული პრობლემებია, რომელიც დემოკრატიული ინსტიტუტების განვითარებას უკავშირდება და სერიოზული ბრალდებებიც წამოაყენა, თურმე რუსეთის მიმართ დაწესებულ სანქციებს საქართველო არ უერთდება. ეტყობა საერთოდ არ იცის ან სალომე ზურაბიშვილმა განგებ არ ჩააყენა საქმის კურსში, რომ საქართველოს ტერიტორიაზე რუსეთის მიერ სანქციების თავის არიდების არანაირი ფაქტი არ გამოვლენილა. ამის შესახებ საკმაოდ ავტორიტეტულმა კომისიამ ილაპარაკა. რაც შეეხება ორმხრივ სანქციებს, ესეც უნდა სცოდნოდა ზურაბიშვილის, რომ რუსეთისთვის ეს შესამჩნევი არ იქნება, ხოლო საქართველოს დაანგრევს ეკონომიკურად, თუკი ცალმხივ სანქციებს დააწესებს, რომელიც მყისიერად გადავა ორმხრივ სანქციებში და ჩვენ დავზარალდებით. ამის თაობაზე თუ ინფორმაცია არ მიაწოდა იმ ხელმძღვანელებს, ვისაც შეხვდა სალომე ზურაბიშვილი, შეგვიძლია, შევაფასოთ როგორც უკვე ფაქტობრივად, საქართველოს ინტერესების მოწინააღმდეგე ბანაკში მყოფ პოლიტიკოსად. ვფიქრობ, მას ანგარიში აქვს ჩასაბარებელი არა ნინო ლომჯარიასთან ან ქალ დეპუტატებთან, რომელთაც პატივს ვცემ, არამედ ხალხთან. მთავრობას თუ არ ესაუბრება თავისი ვოიაჟის შედეგების შესახებ, ხალხს მაინც აუხსნას, რა წაიღო და რით წამოვიდა ვიზიტებიდან, რომელიც შეუთანხმებლად, კონსტიტუციის დარღვევით ჰქონდა“, – განაცხადა ვოლსკიმ.