აშშ-ის საპრეზიდენტო არჩევნებამდე ორი კვირით ადრე ორივე კანდიდატს გამარჯვების თანაბარი შანსი აქვს. ჰარისის და ტრამპის საარჩევნო შტაბები იბრძვიან გადაუწყვეტელი ამომრჩევლების მხარდაჭერის მოპოვებაზე.
კამალა ჰარისი ფსონს დებს რესპუბლიკურ პარტიაში ტრამპისტებსა და ტრადიციულ რესპუბლიკელებს შორის განხეთქილებაზე. ჰარისი ამომრჩევლებს ხვდება ლიზ ჩეინისთან ერთად, დიკ ჩეინის ქალიშვილთან. დიკ ჩეინი იყო ვიცე-პრეზიდენტი ჯორჯ ბუშ-უმცროსის ადმინისტრაციაში. ლიზ ჩეინი წარმოადგენს რესპუბლიკური პარტიის „ძველი გვარდიის“ ინტერესებს, „რეიგანისტებს“, რომლებიც დონალდ ტრამპის იზოლაციონიზმს აშშ-ის გლობალური ინტერესებისთვის საფრთხედ მიიჩნევენ.
კამალა ჰარისი ასევე იყენებს დონალდ ტრამპის ადმინისტრაციის ყოფილი ჩინოვნიკების გამოთქმებს, რომ ტრამპი საფრთხეს უქმნის შეერთებულ შტატებს. მაგალითად, ჯონ კელის, ოთხვარსკვლავიანი გენერლის, რომელიც ხელმძღვანელობდა ტრამპის ოფისს 2017-2019 წლებში, მიცემულ სკანდალურ განცხადებას გაზეთ The New York Times-ისთვის, რომ დონალდ ტრამპი არის „ფაშისტი“ და აპირებს მართოს, როგორც დიქტატორი. https://www.nytimes.com/2024/10/22/us/politics/john-kelly-trump-fitness-character.html
CNN-ის ოფისში კამალა ჰარისის პრესკონფერენციაზე წამყვანმა ვიცე-პრეზიდენტს ჰკითხა, მიიჩნევს თუ არა იგი დონალდ ტრამპს ფაშისტად, რაზეც ჰარისმა დადებითი პასუხი გასცა. https://edition.cnn.com/2024/10/23/politics/takeaways-kamala-harris-town-hall/index.html
ჯო ბაიდენის პრესმდივანმა, კარინ ჟან-პიერმა ასევე დაადასტურა CNN-თან ამ ოთხშაბათს, რომ პრეზიდენტი ბაიდენი ტრამპს ფაშისტად მიიჩნევს. https://edition.cnn.com/2024/10/23/politics/biden-trump-fascism/index.html
დემოკრატები ადრეც ასახავდნენ დონალდ ტრამპს, როგორც პოტენციურ დიქტატორს და საფრთხეს შეერთებული შტატების დემოკრატიული ღირებულებებისთვის. თუმცა, იარლიყი „ფაშისტი“ არ გამოიყენებოდა ტრამპთან მიმართებაში. არჩევნების ბოლო ეტაპზე კამალა ჰარისის შტაბმა გადაწყვიტა გაეძლიერებინა თავისი კანდიდატის რიტორიკა, რათა გავლენა მოეხდინა გადაუწყვეტელ ამომრჩევლებზე.
ჟურნალ Politico-ს მოჰყავს NPR/PBS News/Marist-ის მიერ ჩატარებული სოციოლოგიური კვლევა, რომლის მიხედვითაც „დემოკრატიის დაცვა“ გადამწყვეტი ფაქტორია დემოკრატების 72%-ის, გადაუწყვეტელი ამომრჩევლის 63%-ისა და რესპუბლიკელების 55%-ისთვის. https://www.politico.com/news/2024/10/23/elizabeth-neumann-john-kelly-trump-warnings-00185181
ჰარისის კამპანია ასევე ეყრდნობა გამოკითხვის მონაცემებს, რომლებიც აჩვენებს, რომ დონალდ ტრამპის არასტაბილურ და არაპროგნოზირებად პიროვნებად პოზიციონირებამ შეიძლება გავლენა მოახდინოს გადაუწყვეტელ ამომრჩევლებზე.
დონალდ ტრამპი უარყოფს ყოფილი ქვეშევრდომების ბრალდებებს და ეყრდნობა პოპულისტურ დაპირებებს. აქვე უნდა აღინიშნოს, რომ დონალდ ტრამპის უმსხვილეს სპონსორებს შორის არიან ლას-ვეგასში კაზინოს მფლობელი მირიამ ადელსონი და ლეგენდარული ბიზნესმენი ილონ მასკი. ადელსონი ამჯობინებს კულისებიდან გავლენას საარჩევნო კამპანიაზე, ხოლო მასკი აქტიურად მონაწილეობს დონალდ ტრამპის კამპანიაში.
ილონ მასკი არ არის მხოლოდ მდიდარი ბიზნესმენი. ის გახდა აშშ-ს ტექნოლოგიური ლიდერობის სიმბოლო. ილონ მასკი არის ერთგვარი “სუპერმენი” ბიზნეს სამყაროში. მსახიობ რობერტ დაუნი-უმცროსის მიერ შექმნილი “რკინის კაცის” პოპულარული პერსონაჟი დიდწილად შეესაბამება ილონ მასკის იმიჯს.
ამავე დროს, ბეტმენის როლის ლეგენდარულმა შემსრულებეკმა მაიკლ კიტონმა ინსტაგრამზე გამოაქვეყნა პოსტი, სადაც აკრიტიკებს მათ, ვინც მხარს უჭერს ტრამპს და მასკს.
ასე რომ, სიმბოლურად, “ბეტმენი” ბრძოლაში შევიდა “რკინის კაცთან” ილონ მასკთან კამალა ჰარისის მხარდასაჭერად.
პოპ კულტურის მიერ შექმნილი პერსონაჟები დიდ როლს თამაშობს ამერიკის პოლიტიკაში. ილონ მასკის მონაწილეობამ დონალდ ტრამპის კამპანიაში უკვე გამოიღო შედეგი – ტრამპის რეიტინგმა გაუმჯობესება დაიწყო.
მაგრამ კამალა ჰარისს ჯერ არ გამოუყენებია თავისი კოზირი – მომღერალი ტეილორ სვიფტი. ტეილორ სვიფტმა უკვე გააკეთა განცხადება, რომ მხარს უჭერს კამალა ჰარისს, თუმცა ჯერ არ მიუღია აქტიური მონაწილეობა ჰარისის კამპანიაში. ვინაიდან გადაუწყვეტელი ამომრჩევლები იღებენ გადაწყვეტილებას კენჭისყრამდე დაახლოებით ერთი კვირით ადრე, შეიძლება ვივარაუდოთ, რომ სწორედ ამ დროს იქნება ტეილორ სვიფტი აქტიური კამალა ჰარისის საარჩევნო კამპანიაში. სვიფტი ყველაზე პოპულარული მომღერალია შეერთებულ შტატებში, რომელიც ცნობილია თავისი ლიბერალური შეხედულებებით. თუ ტეილორ სვიფტი დაგმობს “ფაშისტ” დონალდ ტრამპს, ეს შეიძლება გახდეს გადამწყვეტი მომენტი აშშ-ს საპრეზიდენტო არჩევნებში.
ავთანდილ წულაძე