უკრაინის პრეზიდენტმა, ვოლოდიმირ ზელენსკიმ განაცხადა, რომ აშშ-ში ორპარტიული მხარდაჭერის დაკარგვას შიშობს მას შემდეგ, რაც „ზოგიერთი „რესპუბლიკელებისგან“ სახიფათო გზავნილები წამოვიდა“. ინფორმაციას ამის შესახებ ტელეკომპანია CNN-ი ავრცელებს.
„მაიკ პენსი [აშშ-ის ყოფილი ვიცე-პრეზიდენტი] გვესტუმრა და ის მხარს უჭერს უკრაინას. პირველ რიგში, როგორც ამერიკელი, შემდეგ კი როგორც „რესპუბლიკელი“. [აშშ-ში] ორპარტიული მხარდაჭერა გვაქვს. თუმცა, მათ [„რესპუბლიკელების“] წრეებში არის განსხვავებული გზავნილები უკრაინის მხარდაჭერასთან დაკავშირებით. ზოგიერთი „რესპუბლიკელისგან“ მოდის მესიჯები, ზოგჯერ სახიფათო მესიჯები, რომ შეიძლება ნაკლები მხარდაჭერა იყოს“, – აღნიშნა ვოლოდიმირ ზელენსკიმ.
უკრაინის პრეზიდენტის თქმით, მიუხედავად იმისა, თუ ვინ გაიმარჯვებს აშშ-ის 2024 წლის საპრეზიდენტო არჩევნებში, ორპარტიული მხარდაჭერის შენარჩუნება „უკრაინისთვის ყველაზე მნიშვნელოვანია“.