ჰუსიტების მიერ სტრატეგიული პერიმის კუნძულის დაკავება ბაბ-ელ-მანდების სრუტეში მნიშვნელოვნად ცვლის ძალთა ბალანსს ახლო აღმოსავლეთში. ეს კუნძული მდებარეობს სრუტის ყველაზე ვიწრო ნაწილში, საიდანაც საუდის არაბეთი ნავთობს ექსპორტზე უშვებს. ჰორმუზის სრუტეში არსებული პრობლემების ფონზე, ალტერნატიული მარშრუტის მნიშვნელობა კიდევ უფრო გაიზარდა. ირანი ოფიციალური განცხადებით მიესალმა ჰუსიტების წარმატებას, რაც მის პოზიციებს აშშ-თან დაპირისპირებაში ამყარებს.
საუდის არაბეთის მემკვიდრე პრინცმა ბინ სალმანმა ორჯერ მიმართა აშშ-ის პრეზიდენტ დონალდ ტრამპს ჰუსიტების პოზიციებზე საჰაერო დარტყმების განხორციელების თხოვნით, თუმცა უარი მიიღო.
აშშ-ში ბენზინისა და დიზელის ფასების ზრდა მოსახლეობის უკმაყოფილებას იწვევს. სოციოლოგიური კვლევები აჩვენებს, რომ ამომრჩევლები უკმაყოფილონი არიან ირანთან ომის ეკონომიკური შედეგებით, რის გამოც რესპუბლიკური პარტიის რეიტინგი კლებულობს.
ენერგორესურსების გაძვირებას თან ახლავს სასუქების ფასის ზრდა, რაც ამერიკელ ფერმერებს მძიმე მდგომარეობაში აყენებს. ეს ფაქტორი საფრთხეს უქმნის რესპუბლიკელთა პოზიციებს იმ შტატებშიც კი, სადაც ისინი ტრადიციულად ძლიერები იყვნენ. ყველაზე პესიმისტური პროგნოზებით, რესპუბლიკელებმა შესაძლოა არჩევნებში არა მხოლოდ წარმომადგენელთა პალატში, არამედ სენატშიც დამარცხდნენ.
დემოკრატიული პარტია წინასაარჩევნო კამპანიის მთავარ თემად სწორედ საწვავის ფასების ზრდასა და ირანთან ომის ეკონომიკურ შედეგებს იყენებს. მათი რეკლამების ნახევარზე მეტი სწორედ ამ საკითხს ეხება.
ტრამპის სტრატეგია – ეკონომიკური ზეწოლით ირანის იძულება მოლაპარაკებებზე – შედეგს ვერ იძლევა. ირანი, თავისი პროქსის – ჰუსიტების – მეშვეობით, კონფლიქტის ესკალაციას ახორციელებს. ტრამპი ცდილობდა, ნოემბრის შუალედურ არჩევნებამდე ფართომასშტაბიანი სამხედრო ოპერაცია თავიდან აეცილებინა, თუმცა ბაბ-ელ-მანდების სრუტის დაკარგვამ მისი გათვლები ჩაშალა.
ახლა ტრამპი რთული არჩევანის წინაშე დგას: დაიწყოს სამხედრო ოპერაცია ირანის წინააღმდეგ არჩევნებამდე, ან დათანხმდეს თეირანის პირობებს, რაც ფაქტობრივად კაპიტულაციას ნიშნავს.
სექტემბრის ბოლოს დაგეგმილი ტრამპისა და სი ძინპინის შეხვედრა ამერიკელ პრეზიდენტს სუსტი პოზიციებიდან მოუწევს. მან ვერ მოახერხა უკრაინაში ომის შეჩერება. ირანმა ინიციატივა ხელში აიღო, ხოლო აშშ-ში საწვავის ფასები კვლავ იზრდება, რის გამოც ტრამპის დაპირებებს ამომრჩევლები აღარ ენდობიან.
რესპუბლიკელთა შესაძლო მარცხი შუალედურ არჩევნებში ტრამპისთვის მძიმე პოლიტიკური დარტყმა იქნება. ტრამპი „კოჭლ იხვად” იქცევა ორი წლით ადრე, ვიდრე პრეზიდენტის არჩევნები გაიმართება. დემოკრატების გამარჯვება ნიშნავს იმპიჩმენტის პროცესის დაწყებას, ფინანსური ოპერაციების გამოძიებას ტრამპისა და მისი ოჯახის მიმართ.
ასეთ ვითარებაში, ჩიხში მოქცეული ტრამპმა შესაძლოა სამხედრო კონფლიქტების ესკალაციას მიმართოს, როგორც უკანასკნელ არგუმენტს საკუთარი პოლიტიკური გადარჩენისთვის.
ავთანდილ წულაძე,პოლიტიკის ანალიტიკოსი