პარტია “სოლიდარობა მშვიდობისთვის” საერთაშორისო მდივანი, მამუკა ფიფია ბელგოროდში განხორციელებულ ვიზიტს აფასებს და აცხადებს, რომ ჰუმანიტარული მისია მხოლოდ პოლიტიკური ნაბიჯი არ არის, არამედ ადამიანური ვალის შესრულებაა.
“ჩემი მორიგი ვიზიტი ბელგოროდში არ არის მხოლოდ პოლიტიკური ხასიათის. ეს არის იმ საქმის გაგრძელება, რომელიც მიმაჩნია ჩემს ვალად, როგორც ქართველისა და მართლმადიდებელი ადამიანის.
ჩვენ ჩავედით ბელგოროდში ყველაზე ბრწყინვალე დღესასწაულის – აღდგომის წინა დღეებში, რათა საქმით დაგვემტკიცებინა: ქართველი ხალხი ყოველთვის იყო და იქნება მოძმე რუსი ხალხის გვერდით.
ამჯერად ბელგოროდში ჩავიტანეთ მძლავრი გენერატორების პარტია და სააღდგომო ნობათი . პასუხი კითხვაზე – “რატომ გენერატორები?” – მარტივია. მუდმივი სარაკეტო დაბომბვების გამო მშვიდობიანი მოსახლეობა ელექტროენერგიის გარეშე რჩება. თუმცა ყველაზე საშინელი ისაა, რომ სახლებში არიან ადამიანები, რომლებიც სასიცოცხლო აპარატებზე არიან მიერთებულნი.
ელექტროენერგიის გარეშე ეს ხალხი განწირულია. ჩვენ ჩავიტანეთ ეს დანადგარები, რათა სიცოცხლე არ ჩაქრეს და ადამიანებს ჰქონდეთ იმედი.
ვიზიტის ფარგლებში გაიმართა მნიშვნელოვანი შეხვედრები რეგიონის ხელმძღვანელობასთან.
ჰუმანიტარული ვითარება დეტალურად განვიხილეთ ბელგოროდის საოლქო დუმის სპიკერთან, იური კლეპიკოვთან და პირველ ვიცე-სპიკერთან, ელენა ბატანოვასთან. სასიხარულოა იმის დანახვა, თუ რა თავდადებით მუშაობენ კოლეგები საკუთარი მოქალაქეების უსაფრთხოებისთვის.
ასევე, ჩვენი მისიის კოორდინაციაში მონაწილეობა მიიღო ნიკოლაი მუხინმა, რომელიც ხელმძღვანელობს რეგლამენტისა და სადეპუტატო ეთიკის კომიტეტს. ამ შეთანხმებულმა მუშაობამ მოგვცა საშუალება, მაქსიმალურად სწრაფად მიგვეწოდებინა დახმარება მათთვის, ვისაც ეს სჭირდება.
განსაკუთრებით მინდა აღვნიშნო აპტი ალაუდინოვთან შეხვედრა. ჩვენი საუბარი შეეხო მთავარს – ღირსებას, სიტყვის ერთგულებას და იმას, რომ ნამდვილი მეგობრები გასაჭირში იცნობიან. ჩვენს ხალხებს საერთო ბედი აკავშირებს და ვერანაირი გარე ძალა ვერ შეძლებს ამ კვანძის გაწყვეტას.
თუმცა, ჩემთვის ყველაზე მნიშვნელოვანი გახდა უბრალო ბელგოროდელებთან ურთიერთობის წუთები. სააღდგომო პასქების დარიგებისას და ხალხისთვის ქრისტეს აღდგომის მილოცვისას, მათ თვალებში ვხედავდი იმის გააზრებას, რომ ჩვენ ერთიანი სულიერი სივრცე ვართ. ბელგოროდელები დიდ მადლიერებას გამოხატავდნენ, ქართველ ხალხს გულთბილ სალამს უთვლიდნენ და ყველას ულოცავდნენ დამდეგ აღდგომის დღესასწაულს.
ბელგოროდის მცხოვრებლებს ვუსურვე სულის სიმტკიცე და, რაც მთავარია, უსწრაფესი და მყარი მშვიდობა. ჩვენ არ ჩაგვიტანია მხოლოდ პროდუქტები და ტექნიკა – ჩვენ ჩავიტანეთ იმედი.
დარწმუნებული ვარ: ჩვენს ქვეყნებს შორის სრულმასშტაბიანი ურთიერთობების აღდგენის გზა სწორედ ასეთ “ჰუმანიტარულ დიპლომატიაზე” გადის. ამ წმინდა დღეებში ჩვენ კიდევ ერთხელ შევახსენეთ ყველას: ერთობაშია ჩვენი ძალა, ხოლო მოწყალებაში – ჩვენი გზა მომავლისკენ” -აცხადებს მამუკა ფიფია.
